La tribune libre patoisante
 

Les pêqueux dans l'Aveyron...
 

In juin 2006, el séjour pèque i s’a passé dins l’Aveyron.

In arrivant in a eu eine saisissure, Marie-Françoise al avot eine oeillarte qu’al i mingeot l’démotié dé s’figure ! Al avot quéu et al s’avot même coeupé l’arcade dé s’n’ouel ! Al muchot tout cha par drère des grandes leunettes noirtes. Seûremint des leunettes ed solel. Cor héreux qu’i n’pluvot pas, al arot eu l’air biête ! In tot à peine armis d’avoir vu cha, qu’Serge et Arlette i z’arrivot’. Elle, al avot un g’nou comme eine tiête ed vieu. Al avot oussi ramassé un gadin ! Jamais deux sans tros ! Qui ch’est qui va cor quéir ? Qui s’démandot’ té tertoutes ! ‘’ Pas mi ‘’, qu’j’ai répondu, j’ai d’jà donné l’année passée in cassant m’gambe !

Et in s’a estallé in s’promettant d’faire bonne impression, dé s’faire bin vir pa les patrons et l’personnel. Alors tous les jours, in débarrassot l’tab’, in impilot les verres, in ramonch’lot les cuillers et les fourchettes. L’hotéière al nous arméciot avec un grand sourire. Rapport qué l’diminche les fèmes ed ménache i n’ouvrot’ té pas, Charles i a ramoné les escaiers dé l’montée du heut pace qu’y avot des maclotes ed berdoulle sémées pa les péqueux. El lind’main y a des fouteux d’gins qui li disot’ : Charles, hier t’as fait les escaiers, aujord’hui t’as qu’à faire el trottoir ! . . .

Tout cha ch’est bin bieu, mais du côté des pissons, cha n’a pas té l’pèque miraculeuse. I avot pas d’plache pou s’estaller, y avot pas d’fond. I faullot lancer l’line à dix mètes pou essayer d’péquer ! Cor héreux qu’Charles et pis Claude i z’avot’ am’né leu n’amorçache explosif ! I z’ont sauvé l’honneur ! Serge i avot volu péquer avec un pisson crévé, mais in lançant s’line, el pisson i s’a décroché et i a volé dins les airs avant d’arquéir edsus l’bord d’in face. Les cheux qui n’avot’ té pas vu l’début des opérations i s’démandot’ cheu qu’ch’atot qué ç’ nouvelle sorte ed pisson volant !

A part cha, i n’s’a pas passé grand cosse. Dins l’villache, y a eu un mariache, mais i n’ont pas fait d’potin par nuit et i n’nous ont pas impéchés d’dormir. Par cont’ Fernand et Mimi, qui logeot’ té dins leu campine-car edsus l’plache du villache i z’ont té révïés à quatre heures du matin pa les gins dé l’noce. Ces lal, i z’ont escoué l’camion tant qu’i z’ont pu et i z’ont crié : ‘’ On sait que vous êtes là ! On sait que vous êtes là ! . Fernand et Mimi i tot’ allotés comme des pronniers. Fernand i s’a l’vé comme i a pu, cor binteut i arqueyot edsus Mimi. Tout in berloquant i a mis s’pal’tot d’pyjama, à l’invers, selon Mimi, et i a ouvert el porte du campine-car. I leu z’a d’mandé à tertoutes si i z’avot’ un problème. Quand i l’ont vu, ses yeux pleins d’cachifes, coiffé comme un dépourreux d’églisse, i z’ont compris leu n’erreur et i sont d’allés tertous leu queue inter leu pattes ! Nou comarade i a té s’arcouquer, i s’a rindormi et i a rêvé qui étot vraimint l’jonne marié. Que volez-vous, quand in rêve in a l’drot dé n’pas s’rappeler qu’in n’peut pas êt’ et avoir été !

Côté touristique, in a visité tout cheu qu’in a pu. El meilleu souv’nir qu’in a gardé chez l’cheu du catieu du marquis ed Zouzou Zinzin. El brave homme à pus d’quatre vingts ans, i faisot artaper el catieu d’ses ancêt’. Cha i coutot tell’mint quèr, malgré les subvintions, qu’i ni restot pus d’doupes pou acater des bellés loques. I étot ousté comme quate sous. Es maronne ed vélours râpé, al tot toute rasserssie. El principal ch’est qu’ch’atot un bon guide et qui nous a fait bin rigoler. Marie-Françoise al l’a eu quèr tout d’suite pace qu’i l’app’lot Madame la Présidente ! Al s’arderchot ! Et quant à la fin al a volu payer l’visite du groupe, el marquis d’Zouzou Zinzin i l’a emmenée dins eine cahute et i n’in sortot’ té pus ! Nous eutes in attindot dins l’cour du catieu . In s’faisot un sang ! Ch ‘est vrai qu’i avot d’pus d’quatre vingts ans, mais quand même, in n’sait jamais ! Arlette al sé plaindot qu’jé l’faisos rassottir à voloir d’aller buquer à l’porte !

Infin, Marie-Françoise al a débuqué dé l’cahute, al tot toute continte. Al avot chosi tros cartes et l’marquis i li avot offert !

I n’d’a qui ont pâli d’jalous’té pace qu’in arrivant i z’in avot’ acaté et i z’avot’ té dû payer.

V’là tout cheu qu’j’ai arténu du séjour. Pou plus d’esplications i feut vir el rapport ed Marie-Françoise, mais elle, al a filous’té pace qu’al l’a écrit avec toutes les fèmes, tandis qu’mi, j’ai tout fait tout seu !

El prochain coeup, si in peut, in l’f’ra pus longue ! ! !