|
Mercredi 5 avril
2006
Ecrit par Jacques et Marie-Louise HALLIEZ...
Dit par
Jacques HALLIEZ...
Min biau-père Jules ch’atot un
carbonnier, des cheux qu’in veyot arvénir de l’fosse
Blignières, ed’Renard ou bin d’l’Inclos l’guife tout brousée
d’noirte pourrette.
Faut bin sûr que j’vous disse qu’i’étot de D’nain – l’grisse
ville feumière comme in dit – d’usse qu’in d’allot au carbon
d’père in fils.
D’sin père justemint – l’taïon d’Marie-Louise – i’étot gramint
fier ; méneu du Syndicat, méneu d’grèfe à l’fosse, tiète
brûlée pou l’compagnie, marqué au rouche su s’livret d’traval,
tant qu’si bin i’a pus d’ouvrache pour li, interdit, renvoé
d’tous les mines du Nord et pis du Pas d’Calais. Pus d’ouvrache,
pus d’pain pou s’péquée (six bouques à norrir)…
… i’s’a mis faiseux d’frites – bientôt l’meilleux du coin –
avec les peun’tierres d’sin gardin – des bonn’grosses binches
– poussées au puriau.
S’baladeusse installée pas d’vant l’théâte, tertous à D’nain
l’appel'ott’nt « papa Frites », même que Mousseron - l’père du
Zeph Cafougnette bin sûr - li avot donné l’tite de « ch’maîte,
l’roi d’l’écoeumette » !
A
treize ans sonnés, biau-père Jules – archu au certificat -,
fort gaillard pou desquinte au fond gagner s’dringuelle comme
beaucop d’bons fieux à c’temps-là s’artroufe galibot – trieux
d’caillaux, pousseux d’barrous – avant d’passer accrocheux,
hercheux, abatteux, raccommodeux… même qui d’viendra – ch'atot
pas eun’aploute – au bout d’eun' douzaine d’ans : porion.
Ché vrai, i faut que j’vous disse, que marieux à vingt tros
ans et volant offerre bon vivache à Fernande s’tiote brunette
à crôles, Jules i perdot, deux fos pa s'maine après s’jlournée,
l’train d’Anzin dusqu’à l’école d’el Bleuse Borne : deux ans
après le v’là porion !
Figurez vous qu’à c’momint-là, il fallot – qu’tout à l’fos –
l’porion wèfe à l’bowette avec s’n’équip’ d’Quartier et pis
carcule, au jour, l’quinzaine d’ses carbonniers…Que cassemint
d’tiête ! … ed’pus’qu’i fallot busier à tout dusqu’au prix du
lait des cats !
Ouai, ouai, ch’a n’est point eun’carabistoulle… au fond, les
soris alles faisott’nt tant d’allache dins l’avoeine des
quévaux qu’in desquindot des marous pou armette d’lorte dins
tout cha.
Min
biau père, ch’an’étot pas un plaigneux : des borgnons, des
boursiaux, des machuques i’disot toudis « ch’est l’métier qui
rinte ! » ; les berlafes bleusses rintrées dins s’piau ed’
sus ses bras « ch’atot ses galons ! ».
Qui soche ed’jour, d’nuit, d’l’après-midi, de s’cours aux
accidints jamais i’ s’délamintot.
Sin grand plaisi quand i’étot du matin, ch’atot d’arporter à
ses deux fill’s, bin intorténé dins s’malette, eun’ ziq « ed’pain
d’aloette », pétiot restant d’tartine plaqué d’fromache
blancet d’bon burre qui guille.
A l’artour d’l’école, que gince pou Marie-Lou !... comme si
alle partingeot avec sin père, aussi bin s’briquet au goût
étrange, qu’sin dur ouvrache ed carbonnier.
Après trente trois ans d’ fond, les poumons ingorgés d’carbon,
il s’artroufe au Chint' d’apprintissache pour armoutrer l’ouvrache
aux jonnes galibots.
Qu’eu bonheur ! pas qu’il l’a querre s’métier… mais jamais
i’n’in parle à l’mason, sogue à s’comarate d’fosse « l’vieux
Suisse » quand i’passe.
Ch’est vrai dins l’temps, l’z’anciens arbaptissott’nt tertous
d’noms j’tés : dins l’coron d’Gaillettes i avot « l’fill’du
sale tabier », « l’garchon du carreau cassé » et pis « l’vieux
Suisse » ! vas-t-in savoir porquoi ?
D’sin traval, il’in parlot bin sûr à Mousseron l’diminche
quand l’ «poète mineur » passot pa’l’Rue du Gravier pou
d’viser, boir' eun' tasse et minger un morciau d’tarte à
pronnes à gros bords ou bin au papin, l’espécialité d’Fernante,
l’brafe mérotte.
Quand j'l'ai connu min biau-père, ch’atot pitié de l’vir ploïé
in deux, atofant, suffoquant, toussant, raclant pour arpreinte
s’n’haleine ; décati, i n’avot pus q’des oches dins s’carcasse ;vous
l’savez bin, l’silicosse all’laisse point beaucop d’temps au
carbonnier artraité !
L’velle ed partir, v’la-ti pas qu’i nous dit « N’vous en
faites point l’zinfants, pasque mi là-vau au
gardin-grenn’dints, j’vas avoir du plaisi à r’vinte ».
Comme in l’ravisot estoqués, i’ajoute « Bin, ouai, su l’tombe
à côté d’eul mienne, i’a écrit « Famille rigolo.» !
L’étot
ainsi m’biau père, i’avot pus quer’ l’riache que l’brayache.
A ch’t’heure, quand j’passe dé d’vant l’carreau du buffet et
que j’ravise s’lamp’d’fosse pindue à l’planque, je m’dis que
l’coron aduss qui restot… i’n’d’a pus !
…et
les terrils d’el fosse Blignières et cheulle d’l’Inclos dùs
qu’i’a ouvré… dù qui sont ?
« Dù
qui sont ? » , comme dit l’canchon !
[Précédente] [Suivante]
|
