El 8 sectemb’ ch’atot l’marche inter les deux caps avec el visite à Dunkerque des deux musées portuaires, l’ein à quai, l’eute à flot.

Eine sémaine avant ed d’aller, Georges i archot ein coeup d’téléphone :’’ In peut vir el batieu à flot, mais d’lon ; i est in réparations, cha n’s’ra pas possib’ ed monter eddins !’’.

Bin seûr, ch’est binteut à l’dernière minute qu’in prévient les gins ! In va cacher aute cosse pou rimplacher l’visite dé l’duchesse Anne, pusqué ch’est comme cha qu’cha s’appelle. . .

In a trouvé ! Cha s’ra eine péniche. Tant pire ! Cha s’ra sûr’mint moins intéressant, mais y a foque cha !

El voïache in autobus i s’a fort bin passé. Arrivés au cap Blanc-nez, tertoutes i disot l’sienne.

Mi, j’fais Blanc-nez Gris-nez à pied.

Mi, j’arrête à Wissant.

Mi, j’vas à Wissant à pied, après j’continuerai in autobus esqu’à Gris-nez.

Mi, j’resse din l’autobus pindant tout l’voïache.

J’attinds dix minutes qui dit l’chauffeur, après in s’in va à Wissant.

Mais v’là, qu’Denise al a eine eute idée.

Mi, j’vas prind’ l’autobus, mais pas pou longtemps, jusse pou éviter d’déquinte l’hurée. J’n’ai pas invie d’arjuer l’pièche ed l’année passée quand èj m’ai rétindue ed tout m’grandeur et qué j’m’ai fait bin meu. Après, j’rattrap’rai l’groupe et j’march’rai esqu’à Wissant.

Man ! qui répond Georges, alors i feut qu’l’autobus i démarre tout d’suite, sinon, Denise, té n’arverras pus l’groupe ! Habile ! Habile ! Chauffeur ! Cang’mint d’programme ! Vous d’allez tout d’suite !

Ch’est là qu’Roger i a eu jusse el temps d’sauter d’l’autobus duss qu’i étot in train d’canger d’loques. I mettot s’short, ses cauchures ed marche. I avot perdu du temps pace qu’i n’artrouvot pus ses cauchettes.

Avec Viviane i a essayé d’rattraper l’groupe, mais i z’ont eu bin du meu. I n’les ont pas arjoindus avant Wissant !

L’autobus parti, Georgette et Janine i débuqu’t’ ed derrière el monument qui s’derche au Blanc-nez.[ Précédente ] [ Suivante ]Duss qui est l’autobus ?

I est parti !

Parti ! Mais in n’l’a mi intindu démarrer ! Mais qu’est-ce qu’in va faire ? In a meu din tous les coins, in n’sara jamais déquinte l’hurée !

Ch’est pourtant l’seule solution, qui répond Georges, av’nez, èj vas vous assister.

Alors Georgette et Janine i z’ont déquindu l’pente, les cuisses et les dints serrées. Georges i donnot la main à l’eine, i incourageot l’eute !

Final’mint i sont arrivés sains et saufs in bas dé l’côte et i n’ont pus foque eu à gagner Wissant !

A part cha, tout i s’a bin passé !

Din les habitués, i n’d’a qui ont trouvé qu’ch’atot pus dur d’année in année. I pins’ té qu’ch’est pace qu’i sont moins bin intraînés o bin qu’i z’ont eine milette vieusi ! ! !