La tribune libre patoisante
 

L'chronique d' juin… par Gisèle
 

El 18 mai, St. Omer et l’marais audomarois, voïache organisé par Monique COMBLE. 

Ouais ! qui s’disot Jacques, èm fème al organise des voïaches et rapport à cha in pale toudis d’elle. Mi, in prind pou eine buque. I va faulloir qué j’moute qué j’sus là ! Es coeup chi, èj trouv’rai bin eine saquoai !
Justémint, comme èl visite guidée dé l’cathédrale Noter-Dame al sé faisot in deux groupes, i n’d’a profité pou prind’ el tiête du premier troupeu. ‘’ In va visiter les combles ‘’ qu’al a annonché l’guide.
Cha c’mminchot bin ‘’ Comble ‘’ ch’atot li !
Arrivés din l’guernier, y avot là ein dallache ! Des coulons i vol’tot’ dins tous les coins.
Jacques i étot in avant, tout farot ed servir à quette cosse. Mais, v’là ein coulon qui l’arpère et qui pinse : ‘’ Ti, j’t’ai à l’uel, èj vas t’apprind’ à chi am’ner des gins pou nous déringer ‘’. Là d’sus i li a invoïé eine bonne drouillade in plein d’vanture dé s’n’habillure.
Les arenvaleux i riot’ plein leu panche !
Mais li, i essayot d’torquer l’brin d’coulon sans beaucoeup d’résultat !
Ardéquindu din l’cathédrale, espérant ein mirac’ i a touqué s’mouquo d’papier din l’bénitier et i a arfrotté l’taque. El mirac’ i n’s’a pas produit ; y avot cor ein bieu macaron, garni d’épluchures dé s’mouquo d’papier.
Jacques i étot tout péteux.
Les arenvaleux i s’fouto’t ed li : ‘’ tout cheu qui quét du ciel i est béni. T’as té décoré ed l’ord’ du mérite !’’.
I n’est pus là d’passer l’premier quand i l’ira quette part !
Mais cha s’a arringé ! El mirac’ i n’a foque été arculé d’eine journée. El lind’main Monique al a netchié l’habillure avec dé l’pourette et l’taque al a disparu ! . . . .

‘’ Tout est bin, qui fini bin ’’.  
 

El 3 juin, ‘’ in Thiérache ‘’ journée organisée pa Louise Dopter.

-          Cha s’a bin passé in Thiérache ?
-          Man mère ! In n’peut pas mieux. Louise al nous a fait servir ein fameux erpas !
-          L’année passée oussi.
-          Ouais mais ichi, cha tot cor pus mieux.
-          Et l’visite ed l’écomusée ?
-          In a eu deux intrées : dé l’tarte au maroilles, faite mason et des friands au gambon avec dé l’sauce.
-          Ett’ n’estomac i dévot êt’ bourré !
-          In a eu l’treu normand, cha nous a fait digérer.
-          Et l’visite à l’écomusée ?
-          Trois quartiers d’tarte au maroilles qué j’ai mingés. Et j’n’étos pas tout seu ! In n’a pas volu 
      brissauder.
-          Té vraimint des gueulards !
-          Après in a eu du filet d’canard aux m’tieuts léguèmes.
-          Et l’visite ed l’abbaye ?
-          In dessert ch’atot dé l’tarte d’eine épaisseur ed trois chintimètes.
-          Les fresques ed l’abbaye cha vaulot l’coup d’êt’ vues ?
-          Ch’atot fort dommache, in n’a pas su tout minger. I restot au moins 3 tartes
-          Té cros qu’cha vaut l’coup qu’j’y voèche avec èm n’homme ?
-          Ouais, bin seur ! Ch’atot à Mondrepuis, el restaurant i s’appelle : El Marissieu.

 Gisèle