|
El 1er avril : 22
péqueux i s’sont artrouvés à l’étang d’Verchain Maugré pou
l’widier d’ses truites !
Mais i faullot payer
l’propriétaire. Ch’est Claude, el nouvieu responsap’ qui a
ramassé les doubes. I n’d’avot plein ses mains ! In pus, i a
quéu edsus n’ein capitalisse qui li a donné ein gros billet.
Comme i avot pas d’vint Claude i n’s’a pas déméfié, i a ouvert
ès main toute grande. La edsus, pou l’faire immarvoïer Eole i
a soufflé ein bon coeup, tous les euros i ont volé à l’ieu, et
i s’sont mis à nanger bin tranquill’mint.
Claude i a attrapé bin vite
ès puisette et i l’z’a arpéqués eine milette à l’fos assisté
pa Micheline. I s’sont pas mal foutu qué l’pèque à l’puisette
al tot interdite.
Pendant ç temps là,
l’proprio i avot réimpissonné et les péqueux : habile, habile
i z’avot’ té c’mminché leu carnache sans attind Claude qui
péquot les euros !
Edsus l’première démi heure
i z’ont sorti les truites à l’palée, après ch’est dév’nu
beaucoeup pus dur.
El grand champion cha té
Charles : 22 truites !
Claude , 8 à cause dé
s’n’artard !
Mais i étot quand même fin
contint : ch’atot l’première fos dé s’vie qui avot péqué des
doubes et ien premier avril : queune farce ! ! !
Ej vodro quand même signaler
qu’les péqueux d’l’Arenval i sont vraimint forts. Ed pus tros
ans v’là leus plus belles prises :
Jean : un rat musqué.
Georges : un jone ed canard,
ein bâton d’péque.
Claude : eine mouette et des
dizaines d’euros.
In s’attind à pus mieux !
El 4 avril :
Les patoisants tot’ in
fourfale ! FR3 i d’vot v’nir les filmer pindant leu répétition
à l’salle ed la Dodenne. I n’d’a qui z’avot’ té mis leus
bellés loques !
Final’mint les techniciens
tot’ té bin à l’heure. I z’ont ouvré pindant eine heure et
d’mie.
Les théâtreux i z’avot’ té
bin du meu d’garder l’fil ed leu n’histoire, pace qu’in leu
mettot eine espèce ed manche à ramon pa d’zous leu nez. I a
même ein journalisse qui a monté edsus n’eine tape pou mieux
filmer !
Cor héreux qué l’fème ed
ménache al n’tot pas là !
Les danseux i n’ont même pas
l’drot d’poser leu sono directémint edsus l’beus d’eine tape !
I leu feut mett’ ein tapis.
El lind’main quand cha a
passé à l’télé cha n’a foque duré tros minutes. Mais cha tot
bin présinté ! In a intindu : les théâtreux parler chacun leu
tour, des canchons et in a vu des morcieux d’pièches.
Tertoutes i étot à g’noux
edvant s’poste !!!
El 6 avril : El grand jour i étot arrivé : 225 espectateurs.
Eusses oussi i z’étot’ in
fourfale. I z’avot’ té vu les tros minutes d’arportache à
l’télé. I félicitot’ té les patoisants. Ces chil i n’savot’ té
pus dus donner dé l’tiête !
L’arprésentation al s’a bin
passée.
I z’ont tertous bin
rigolé !!!
El 27 avril : Voïache à
Château Thierry.
Nous v’là cor toudis partis
din l’bas d’l’Aisne !
Jé n’vas pas arcommincher
avec les jeux d’mots !.
I a faullu sé l’ver d’bonne
heure.
Quand j’ai saqué m’jaquette
edsus m’deus, j’ai vu qu’y avot ein bouton qui berloquot, mais
j’n’avos pas l’temps dé m’mett’ à l’couture ! J’ai donc
imbarqué m’fil et m’n’aiguille et quand j’ai té bin estallée
din l’autobus, j’ai arcoeud em bouton berloqueu et tant qué
j’y étos, j’ai rimplaché les eutes. Commme i m’a fait
armarquer l’président, jé n’povos pas arwetcher l’paysache !
Bin seûr les Arenvaleux i
rigolot’ et i m’démandot’ ed leu z’arcoeud’ l’ein ein bouton,
l’eute eine fermeture éclair !
A Château Thierry el musée
d’La Fontaine i étot fort intéressant , mais l’pus d’zolé
qu’in étot, ch’est qu’l’esposition edsus les contes libertins
al n’tot pas cor prête à êt’ moutrée à les gins.
I n’d’a qu’i vont y arvénir
l’année qui vient pou avoir des idées. Mais queulles idées ?
Et pou quoai faire ?
Pou l’première fos qu’i
organisot quette cosse, Piere R. i s’a bin débrouillé. I s’a
occupé d’nous comme si in étot ses infants. Les
preufes ; tous les quate dogts i nous invoïot à l’basse-campe.
Quand i avot fait l’arpérache, ch’est cha qu’i avot vérifié in
priorité. I l’z’avot même comptées. A n’ein indrot i n’d’avot
chinq ! !
In li in su
gré.
Din tros s’maines cha s’ra
l’sortie à St-Omer et l’grande marche à l’journée.
Avis à les amateurs !
Gisèle
|
