- Es n’année chi, el séjour ed pèque, i s’f’ra à Yseures qui a annoncé Jean-Claude, fin contint, à tous les péqeux.

- A Yseures ! Duss qué t’as t’deuxième baraque ! In Indre et Loire ! Beh ! I va nous faulloir passer pa Paris ! qui a répondu Georges.

- Ouais ! Et alors ?

- Alors ? In va d’aller s’ingrinquer dins les bouchons avec tous ces parisiens qui s’crot’ té tout permis ! Is vont nous arfuser l’priorité, nous pousser si in n’va pas vite assez à leu n’idée, nous faire des queux d’pisson !

- Eh ben ! Péqueux comme t’es, té n’vas pas m’dire qué t’as peur d’eine queue d’pisson !

- Jé n’sus pas tout seu à avoir la frousse ! Ravise Claude !

In dé fut fait ç ti chil i moutrot eine tiête à n’pas prêter quarante sous !

- Enn vous faîtes pas d’bile qui a copé Charles, el cheu qui n’a pas quér ed traverser Paris, i n’ara qu’à m’sieuve ! Mi, j’ai un garchon qui resse à Orly, un à Poitiers, èj vas réguièremint à leu mason, èj connos la route par cœur. J’iros mes yeux serrés. Et, jé n’m’in laisse pas armoutrer pa les parigots. Si i n’d’a un qui m’pousse, mi, j’l’arpousse. Si i n’d’a ein eute qui m’arfuse el priorité, aussiteut qué j’peux, mi, j’i cope ès nez et si ein trosième i m’fait eine queue d’pisson, mi, j’i tords ès plaque d’immatriculation !

In intindant cha is z’ont eu tertoutes leu chiffleut copé. ‘’ Eh ben ! qu’is z’ont tout d’même pinsé, ch’est pus eine auto qu’i nous faudrot, ch’est un char d’assaut ! ‘’. Mais comme in étot bin lon d’Marselle tout cheu qu’Charles i v’not d’dire, cha n’povot foque êt’ vrai !

Is s’sont donc donné rendez-vous el dix juin à neuf heures edsus l’aire ed Ressons. Charles, el grand chef d’expédition avec ès fème, Claude avec el sienne, Georges et pis mi. Tout i s’avot bin passé, tertoutes i étot à l’heure. Ein m’tieut tour à l’basse camb’, bin seûr, Charles ed pus tant d’années, i avot l’sienne attitrée ! Et les tros carrettes is z’armettot’ in route. Arrivés au pemier péage, Charles et Claude is prind’ té l’queue pou payer in liquide. Georges , qui n’veut jamais attind’ i s’in va à l’guiole duss qu’in prind les cartes bleusses. Là, y avot pas ein quien ! I crot qu’cha n’marche pas, i arcule et i s’in va pou arprind el file, mais i a ein armords : i ravanche, i met s’carte et cha passe ! Bon, ben, à ch’t’heure i nous feut attind’ nous comarades. . . . In attind ! . . . In attind ! . . .

In n’les vot jamais arriver !

Georges i finit pa dire : avec el dallache qué j’ai fait, in a perdu du temps. Is sont sûr’mint d’vant nous. I nous feut les rattraper. In a donc armis in route et in a foncé, pas d’treup quand même pace qué Georges au mos d’mars i avot d’jà layé deux points et pus quatre vingt dix euros edsus l’auto route qu’al traverse el Beaujolais pou chint trente à l’heure pa temps d’puèfe !  

In avot bieu avancher, in n’veyot jamais nous gins. ‘’ Si cha tombe is sont par drère ! ‘’. I n’d’a pas tant qu’cha qu’j’ai décidé, èj vas app’ler el Nicole ed Charles edsus s’portab’. Après bin des ruses pou artrouver s’numéreu et l’taper, j’ai eu l’répondeur ! Ej l’ai su après, Nicole al cope toudis s’portab’ ! Al s’in sert foque quand al arrive chez ses infants pou leu dire qu’al est là ! J’ai donc essayé d’avoir l’eute Nicole. Là à deuxième sonnerie cha répondot : is z’étot’ par drère ed nous ! In s’a donc donné rendez-vous à l’aire suivante et in n’s’a pus quittés esqu’à Yseures !

Là, in a artrouvé eine paire ed péqueux. Is z’étot’ té tout héreux d’leu vir ! Mais l’pus contints qu’is z’étot’ ch’atot d’avoir trouvé edsus leu tape ed nuit, eine invitation pou six heures etd’mi du soir ed Jean-Claude et d’Marie-Françoise, pou soi-disant discuter du programme. In réalité ch’atot surtout pou boire ein bon coeup et minger des bonnes affaires.

Mais,in étot quand même chagrinés tertous, pace qu’i manquot Jacques et Colette. Is n’avot’ té pas donné sine ed vie, pas ein coeup d’téléphone !. . . Rin !

In est d’allé chez nous amisses in donnant les consines à l’patronne ed l’hôtel.

Tout d’ein coeup, vers sept heures un quart v’là qu’in vot les deux artardataires arriver in rigolant. Colette al criot ‘’ in a mis douze heures ed Valinciennes esqu’à ichi ! ‘’.

- Eh ben ! Qu’est-ce qui s’a passé ? qu’in s’a étonné tertoutes.

- Ch’est Jacques ! A Paris i a pris l’porte d’Italie et i a perdu l’autoroute. I a tell’mint té vesqué qu’i a fait s’tiête ed baudet ; pusqué j’l’ai perdue, jé n’cach’rai pas après ! Ej prindrai n’importe quesse : les nationales, les départemintales et même les vicinales si i feut !

Ch’est comme cha qu’in a traversé Orléans et qu’in s’a arperdus. Là Jacques, i a passé l’dièpe ; pou faire ein démi-tour, i a copé l’line blanque au nez dé l’maraichaussée. Mi, j’crios : arrête, Jacques ès coeup chi is vont prind’ ett’ permis ! Mais in a eu affaire à des braves, is z’ont serré leus z’yeux !

In n’s’a pas layés abatt’, in a té minger ein bon erpas din eine fort belle auberche.

Mi, èj mé sus dit ‘’ vingt noms ! si cha continue comme cha in va souvint avoir ed zoin d’St-Antoine, patron des objets perdus ‘’.

In dé fut fait cha n’faisot qué commincher !

Ein après-midi, in s’in allot, el péqueux à mi temps et les fèmes non péqueusses din ein magasin d’faïence duss qu’in vindot dé l’vaisselle au pods. Là in allot faire ed z’affaires et des rudes économies. In quittant l’hôtel, Marie-Françoise al avot bin espliqué la route : ‘’ à n’ein momint donné, i vous feut passer eine rivière, après ch’est tout drot ‘’. Tertoutes i a démarré, Mimi al tot l’dernière mais al veyot l’z’eutes ed lon. Seul’mint, y a eu les feux, el circulation, al z’a perdus d’vue, et in même temps l’rivière. Al a fait démi-tour pou cacher après ç tel chil, mais al n’l’artrouvot pas. Alors al a récité eine pétiote prière à St-Antoine et al a d’mandé s’quémin à n’ein bonhomme ‘’ suivez moi, je vais vous conduire’’, ‘’ merci St-Antoine ‘’. Et al ous a artrouvés !

El lind’main matin, les péqueux et l’unique péqueusse is mettot’ in route, edsus l’temps qué l’z’eutes is s’préparot’ pou d’aller visiter les invirons, quand Marie-Françoise al t’arrivée toute artournée : les péqueux is sont à l’étang mais is z’ont perdu eine carrette avec tros gins, cé lal is n’ont sûr’mint pas compris duss qu’i faullot d’aller. V’là cheu qu’ch’est d’canger d’indrot ed pèque tous les jours. Pourvu qu’i n’leu seuche rin arrivé !

In réalité is n’tot’ té pas bin lon ; et rapport à les portab’ ed l’ein et l’eute is z’ont té vite artrouvés !

Is péquot’ té tertoutes bin sérieus’mint, quand Georges qui étot in train d’accrocher ein asticot à l’hameçon i s’a mis à s’délaminter ‘’ mais queune affaire, jé n’vos vraimint pus clair, é v’là qué j’n’arrive jamais à percher m’vier. J’ai pourtant mis mes bonnes leunettes !’’.

Là d’sus i arsaque ès monture dé s’nez, i met s’dogt à l’plache du verre qui li paraissot brouillé ; i passe tout oute ! ‘’ Nom des os ! J’ai perdu ein verre ed leunettes !’’. I s’a mis à quate pattes din l’hierpe, i a tout artourné et i n’a rin trouvé ! Deux tros péqueux is sont v’nus à sécours,leu cul à buse, is z’ont caché et racaché mais, sans résultat !

-Eh bin ! J’ai cor gagné em’ journée, qui s’a résigné l’malhéreux péqueux ! L’année passée ch’est mi qui a quéu au jus, ichi si cha tombe ch’est m’verre ed leunettes.

Pis y a eu l’pique nique. El mardi, ch’atot relache. El restaurant i étot serré. El patronne, avec el sourire, al nous a fait comprind’ d’aller minger ailleurs. Mais al nous promettot d’nous préparer ein bon pique nique. Cha nous arringeot tertoutes. El solel i luisot, et pis cha nous cang’rot ! Les péqueux eusses à midi is rest’rot’ té sur plache, is n’perdrot’ té pas d’temps à rimballer, ardéballer, à faire l’allante et l’arvénante edsus l’quémin. Tout i étot donc pour le mieux !

El mardi au matin, Marie-Françoise, al a querqué l’coff’ dé s’carrette. Des plats, i n’d’avot ! ! ! Ed quoai s’péter l’boyau ! Tout l’matinée, in a té visiter cheu qu’i avot à vir, et à midi, in étot dins la nature prêts à minger. I in a qui s’sont dévoués pou assister Marie-Françoise à déquerquer les platieux. Pis, elle, al a arclaqué el porte du coff’. Mais quand al a volu arprind’ ses clés d’carrette qu’al avot layées in n’dins, al s’a rindu compte qué tout i étot serré. Cha s’avot mis in sécurité ! Myard Polyte ! Commins s’y prind’ pou ravoir les clés ? Après avoir caché des solutions, i a té décidé qu’i faullot trouver ein garagissse. Aussiteut dit, aussiteut fait. Dix minutes après, el brave garchon i étot là in train d’essayer d’arpéquer les clés in passant eine baguette espéciale po carreu resté ein creux ouvert. Les consels is n’y manquot’ té pas : faites chi, faites cha. Au bout d’eine paire ed minutes i sortot les clés. I a té beaucoeup pus vite qué nous hommes pou péquer ein malhéreux pisson ! I a té applaudi, i n’d’a même qui li ont sauté au cou pou i faire eine grosse baisse. I n’l’a pas moutré, mais i arot sûr’mint eu pus quèr d’êt’ pochéné pa des jonnes gadrouillettes qué pas des vielles artraitées. Comme i n’volot pas qu’in l’paie, malgré qu’in étot mardi, Marie-Françoise al li a donné s’diminche.

El mercredi, in a continué nous tournée touristique. L’après midi, in arrive à l’indrot dé l’visite, v’là qu’in n’vot pas Mauricette. Chaquène al avot cru qu’al tot din l’carrette d’eine eute. Man mère ! In l’a layée à l’hôtel ! Habile ! Habile ! I feut téléphoner à l’patronne al cach’ra après ! Jamais les portab’ is n’avot’ té tant servis !

Final’mint, i paraît qu’Mauricette al tot couquée din s’cambe. Peu d’temps avant ed d’aller al avot eu s’belle-sœur au téléphone ; is z’avot’ té tell’mint d’affaires à leu raconter qu’Mauricette al avot oblié l’heure. Quand al y a arpinsé tout l’binde al tot involée ! Du fait qu’al avot ein gros catarrhe al d’avot profité pou s’arposer. Mais comme ch’est eine brave gin, al a m’tète dit cha pou n’pas nous contrarier.

El jour suivant Marie-Françoise al nous a annoncé : aujord’hui èj vas vous imm’ner à Angles-sur-l’Anglin. Ch’est ein des pus bieux villaches ed France. Vous rincontrérez sûr’mint des inglais. Is z’acat’ té tout cheu qui s’vind. Surtout au bord dé l’rivière. Après avoir arvisé l’exposition des brod’ries, in est d’allé faire el tour du villache et in est arrivé edsus l’pont qui ingambe l’Anglin. Au lon in veyot des gins in canoë. I a eine paire ed fèmes qui ont avanché, d’z’eutes qui sont restées avec el péqueux à mi-temps à admirer les bords ed l’ieu. Li, i parlot, i moutrot jé n’sais pas quesse avec ès canne, i l’allotot. Ah, èj n’irai pas esqu’à dire qu’i juot les majorettes, mais s’canne al a fini pa quéir à l’ieu et al a disparu pa d’zous l’pont. I a traversé l’route, i s’a penché au d’zeur du parapet pou l’vir passer, mais cha té peine perdue ; ch’est qu’al tot accrchée dins les hierpes. I a artraversé, i s’a arpenché. Es fème qu’al s’étot assise sur ein banc ein m’tieut cosse pus lon avec Marie-Françoise, al sé d’mandot : qu’est-ce qu’i fournaque ? Pour mi i rinfantit. I agit comme el z’infants quand is jettent ein morcieu d’papier à l’rivière . . . Y a quette cosse qui n’est pas clair, v’là Mauricette qu’al fait l’même ! La d’sus, Mimi al arrive in coeurant et in criant : èj vas assayer d’dire à les cheux du canoë ed rattraper l’canne, al est coinchée din les hierpes dé l’rivière.

I avot justémint deux gins au bord dé l’rivière in train d’parler inglais. Alors Mimi al a multiplié ses efforts pou leu z’espliquer dins l’lanque ed Shakespeare cheu qu’al attindot des rameux. Et là, al a manqué d’quéir edsus s’cul quand al a intindu eine des fèmes crier in français à les cheux du batieu ‘’ pouvez-vous récupérer la canne qui est accrochée aux herbes ? ‘’. Tous ses efforts ed langache pou rin ! . . . Si, quand même pou quette cosse , pusqu’al avot su s’faire comprind’. Alors, ès n’inglais i n’dévot pas êt’ ed treup mauvais.

Final’mint l’canne al a té sauvée des ieux et eine fos d’pus tout s’arrigeot ! ! !

Cheu qué j’viens chi d’raconter, cha n’vaut pas cheu qui s’passot tous les jours à midi et au soir. Là, tertoutes i étot perdu din l’rosé et din l’vin blanc. In pus au matin, Mimi al avot toudis peur ed perd’ es line à cause des cérises. A côté des peuts d’confitures, y avot des bellés grosses cérises, rouche foncé. Es péché mignon ! Al les comptot : six qu’al s’accordot ! Par cont’ ès n’homme, Fernand qui s’appelle, i n’comptot pas ses verres ed vin blanc. Par nuit, cha i foutot des crampes. I hurlot ed douleur ! Es fème pou l’consoler al i cantot ‘’ ah, le petit vin blanc ‘’. Alors, li, pou s’arvinger, inter deux crampes i intonnot ‘’ mais il est bien court le temps des cerises ’’, aïot, aïot, èm crampe, ‘’et gais rossignol et merles moqueurs ‘’, aïot, aïot, èm mollet ! Leus visins d’cambe is n’tot té pas d’treup contints d’cha. L’année qui vient, i n’veut’ té pus êt’ à côté d’eusses deux.

Ch’est vrai ! Au fait, Jean-Claude, l’année qui vient, duss ch’est qu’in va ? Et quand est-ce qu’in y va ?