Ch’est bin connu,les Arenvaleux is sont pleins d’doub’ !

Comme is n’sait’ té pas quoai in faire, et qu’is n’tient’ té pas in plache, is s’inscrit’ à beaucoeup d’voïaches organisés pa leu n’amicale. Mais, rapport qu’y a d’pus d’chinq chints adhérents, commins volez-vous intasser tous ces gins, din ein autobus ed chinquante tros personnes ? I n’d’a bin d’chinquante six mais, is n’ont pas d’basse campe ! I faudrot arrêter tous les quate dogts edsus les parkines ed l’autoroute ! Pou tros plaches, el jeu i n’in vaut pas l’candelle. Ch’est pou cha, qu’tous ches malhéreux artraités, du momint qu’is archot’ el programme des sorties is s’creus’t’ té leu tiête pou trouver l’moïen d’arriver edsus l’liste d’inscription des voïaches din les chinquante et un premiers ! Pace qué, si in carcule bin, i feut décompter au pus souvint deux plaches : el cheule ed l’organiseu et pi l’cheule dé s’fème.

A partir ed là, ch’est cor pus pire qué l’course à l’échalote. Les anciens, les cheux qui ont arpéré qué l’bulletin i leu z’est invoïé deux fos par an : l’ein din l’première quinzaine du mos d’sectemb’ et l’eute din l’premiére du mos d’janvier, is s’rinseinn’t din ces à d’voir là, pou savoir queu jour exactemint qué l’président i mettra l’paquet à l’poste ed Pétite-Forêt. Ed là, is surquiell’t té l’facteur ou même is vont à s’rincont’ : à pied o bin in carrette. Ches derniers, is pins’t’ té argagner du temps, mais is s’tromp’t pace qué l’z’eutes is lis’t’ té l’programme edsus l’quémin, in arvénant ! Au bout du compte, cha arvient au même !

Quand is z’ont chosi leus voïaches, les uns et les eutes, habile ! habile ! Is rimplich’t’, is décop’t té les talons, is saqu’t té des chèques ! Is infut’ té tout cha din les inv’loppes, sans oblier les cheules timbrées à leu n’adresse préparées dé l’velle pou l’réponse !

Les pus effoufiés is n’sign’t’ té pas les chèques, o bin is s’trompt’ t’ té d’ord’ !

A ch’t’heure i n’leu resse pu foque à d’aller mett’ tout cha din l’boîte à lett’, o bin pa d’zous l’porte des organiseux. Comme ces chil is d’meurent din des indrots différents, i feut établir ein chircuit. Au pus vite au mieux ! El pus pire, ch’est quand el responsab’ d’eine sortie i a s’n’appartemint din ein immeub’ collectif : glicher cha sous l’porte commune ch’est d’treup risquer. I feut povoir d’aller din l’intrée pou avoir el boîte à lett’ à pétache. Alors is sonn’t’ té chez l’organiseu. Si i n’répond pas, is z’appoét’ té edsus l’sonnette d’à côté et is racont’ té leu n’histoire comme is peut’ t’, presque suppliants pou qu’in leu ouèfe el porte, comme à des malhéreux mendiants.

Arvénus à leu mason is téléphon’t pou savoir si les comarades is z’ont bin trouvé leu courrier.

Queulle journée ! Is n’in peut’ té pus ! Is sont réus !

Mais din tous ces lal y a ein passe muralles ! Charles, qui a s’n’appartemint au quatrième étache ed l’immeub’ Capron, i n’avot rin vu, rin intindu et i a artrouvé eine inv’loppe din s’couloir ! Ed pus ç temps là ès fème, Nicole, al n’in dort pus ! Al a eine frousse bleusse d’artrouver m’n’homme là au fond dé s’lit !

Pierre, li, i pinse qu’i n’d’a qui vient’ té par nuit. El jour au soir, i avot widié s’boîte à lett’ et lind’main quand i s’a l’vé, al tot cor pleine. Mais si cha tombe i n’nous a pas dit l’fin mot, et i avot fini s’nuit à midi !

Pou arvénir à tous les combines pou arriver din les premiers, i feut quand même vous déméfier. Acoutez l’tour qui est arrivé à Nicole et à Claude. In 2004, is z’avot’ intindu dire qué Monique al organisot eine sortie d’eine journée à St-Quentin. St-Quentin ! Duss qu’is s’promettot’ té d’aller d’pus d’z’années ! Es coeup chi, is z’allot’ in profiter ! Du momint qu’is z’ont archu l’programme, Claude i a bin vite tout rimpli din les règl’, i a bin inscrit l’nom et l’adresse ed Monique : 46 Rue des Mouettes à Marly. Comme is z’avot’ li et pis s’fème décidé ed juer au facteur, is sont partis à deux in carrette cacher l’rue des Mouettes. Etant euzes-mêmes ed Marly cha n’leu z’a pas té difficile à trouver, mais cha a mis Nicole ed trop in confiance, al n’a pas arvérifié l’numéro dé l’mason et al a gliché leu n’inscription pa d’zous l’porte dé l’viseine !

Huit jours après, quand ès brave gin al t’arvenue d’chez ses infants, et qu’al a rindu les papiers à Monique, y avot pus d’plaches ! Nous comarades i s’sont artrouvés edsus l’liste d’attinte !

V’là cheu qu’ch’est ed voloir faire el métier d’ein eute !

Ch’est pou cha qu’y a des arenvaleux qui n’veut’ té pas d’aller edsus les mains des PetT. Is rinwoèt’ té tout, par la poste, el jour qu’is archot’ les propositions. I n’d’a même qui marqu’t au deus d’l’inv’loppe ‘’ expédition el jour dé l’réception ‘’. Vous comperdrez cheu qu’vous vodrez, mais mi, j’traduis cha comme cha ‘’ si té m’mets edsus l’liste d’attinte, ch’est qu’té fais du passe drot. Cha n’m’étot pas posib’ ed répond’ pus vite ! ‘’.

Malhéreus’mint in n’peut pas continter tertoutes ; et les cheux qui s’décid’ à écrire el lind’main, o bin cor pus pire el surlind’main et les jours suivants, is sont seurs ed s’artrouver edsus l’liste des candelles.

Ej d’allos oblier eine eute catégorie : les cheux qui veut’, o bin argagner du temps tout in préservant leus pas, o bin économiser ein timb’ ! Is s’dis’t’ : bah ! ed main et pis même après d’main, èj vas sur’mint rincontrer les organiseux à l’salle ed la Dodenne, y a des activités d’prévues. Pas d’chance : I n’d’a qui n’sont pas v’nus. Les pauv’ candidats aux voïches s’artrouv’t’ avec deux jours d’artard ! Cor héreux y a toudis dé l’plache. . . edsus l’liste d’attinte !

Ichi, aujourd’hui, in vient d’bin rigoler, mais cha pose ein vrai problème. El président i s’gratte ès tiête ! Ein jour, tertoutes in même temps, is prindront leu carrette et is z’iront mett’ leu n’inv’loppe din l’boîte des responsab’ ! Ch’est décidé, in saqu’ra à l’buquette pou chosir les 51 premiers ! ! !