Au marché d’Aulnoy, Gisèle rencontre son amie Thérèse...

Le marchand de légumes, tout en servant ses clients observe nos amies toujours  en bavardages. Il se demande ce qu'elles peuvent avoir à se raconter d'aussi important pour durer tout ce temps ?
Et Georges qui commence à avoir une petite faim... Et Georges, quand il a faim...
Mais Gisèle la bavarde continue, puisque Thérèse la curieuse insiste...

Alors, voilà!

                            LA CHINE   (Troisième partie).

                                                                                                           . 
G : Nous z’eutes, à Pékin, in a té mieux sognés qu’cha ! Danièle al nous couvot, comme des m’tieuts poulets. D’abord, quand in est arvénus du marché dé l’norriture, al nous avot bin espliqué commins qu’i faullot s’y prind’ pou d’aller quèr un taxi.
T : Et t’n’as pas eu d’imbroulles ?
G : Ninr, mais i n’a tros qui s’sont artrouvés à l’eute bout d’Pékin.
T : A cause du taxi ?
G : Ouais, pourtant Danièle al z’avot mis elle même ed din ! Les gins i z’ont moutré l’carte ed visite ed l’hôtel. Mais malhéreus’mint i n’d’avot un eute du même ninr, du côté opposé. El l’chauffeur i n’a pas ravisé l’adresse et i z’ont fait l’grand tour pou avoir pus court !
T : I z’ont mis beaucoeup pus longtemps ?
G : Au moins eine démi- heure ! Comme i s’étot’ té donnés rendez-vous au bar, Danièle et pi Denis i tot' étonnés dé n'pas les vir quand i sont arrivés à leu tour.
T : Et i les ont attindus in buvant du saké pindant eine demi-heure ?
G : Cha, Danièle al n’mé l’a pas dit. I tot’ té v’nus pou nous guider, pas pou widier les réserves ed l’hôtel.
T : In fait, grâce à eusses t’as fait un bieu voïache !
G : Cha ch’est vrai ! Et Georges i a même appris à conduire un trichycle au marché aux puches.
T : Faullot payer ? Comme ichi les infants d’su les baudets ?
G : Ch’atot un vélo à tros roules avec eine remorque querquée à mort, qu’al apparténot à n’un chinois.Georges i li a fait comprinte qu’i avot invie dé l’conduire. L’eute, bon garchinr i li a layé l’plache, mais Georges i n’savot pas démarrer : i poussot tant qu’i povot, edbout d’su les pédales. I étot rouche comme un coq et i criot : i a chi eine querque d’au moins chinq chints kilos !
T : I arot pu avoir eine hernie !
G : Et pis tout d’un coeup, i est parti, et là, i n’savot pus s’arrêter. I s’in d’allot tout drot din les potiches d’un vindeux. El propriétaire du vélo i a attrapé l’droulle, i a saqué d’su l’guidinr et i a arpris s’n’engin.
T : Té t’amuses comme ed z’infants ti z’eutes !
G : Ouais, mais pou raller in n’a pas toudis rigolé. Ed Pékin in a arpris l’avion esqu’à Shang Haï. Là, in a cangé d’aéroport pou povoir argagner Paris. Inter les deux aéroports i nous ont fait monter din un autobus. Ej n’avos jamais vu cha ! El soute al tot tell’mint étrote qu’in n’savot pas y infuter les bagaches.
T : Duss té l’z’as mis ?
G : In l’z’a passés pa l’feurniette. In n’povot même pas les glicher din l’allée du mitan. In l’z’a estallés d’su les banquettes.
T : Cor héreux qu’i restot dé l’plache.
G : I avot deux autobus du même genre : din l’deuxième, el l’chauffeur i ressuot s’pare-brise avecun mouquot in papier. I a oussi perdu un morcieu dé s’tuyeu d’écapp’mint !
T : I sont vraimint modernes.
G : Ouais mais à Paris, ch’est aut’cosse et ch’n’est pas mieux ! Ej t’ai dit qu’i z’avot’ arraché les billets d’aller et d’artour à plusieurs personnes, qu’i s’in étot’ aperçus et qu’i leu z’avot’ té té rinde.
T : Ouais ! J’m’in rappelle.
G : Eh bin, l’pus pire ch’est qu’i z’avot’ té fait l’coeup à Brigitte mais sans rin i rinde. Elle, al n’avot rin vu ! Al n’avot foque les souches et à Shang Haï i n’ont pas volu l’laisser passer.
T : Al est restée là ?
G : Claudine et pis Denis i z’ont discuté in inglais pindant eine heure ! Pas moïen d’in sortir ! El pétiote imploïée al volot autant d’billets qué d’personnes et al n’arnonchot pas. Denis i étot in fièfe, i étot tout cru d’coeud. I l’invoïot téléphoner à Paris. Danièle al l’ingueulot. El tiote chinoise al tot rouche, prête à braire. Danièle pou l’consoler al l’imbrassot. T’aros vu l’ouvrache !
T : T’as là fait un rude jeu avec les couleurs. Té m’as parlé d’certains chinois qui n’riot’ té pas jaune, d’z’eutes qui tot’ té noirs comme des fouants, ichi in v’là eine qu’al rougit. Qu’est ce qué cha donnot tout cha à chaque fos comme teinte ?
G : Tout ç qué ch’peux t’dire , ch’est qué l’tiote al tot oranche, et qu’ch’est din ç n’état là qu’al est d’allée quèr eine interprète, et qué grâce à cha tout i a fini pa s’arringer.
T : Brigitte al a dû ête bin soulagée !
G : Té pinses ! Al sé veyot d’jà dormir ed su l’banquette ed l’aéroport. Les eutes i li disot’ : ènn t’in fais pas, si i n’veut’ té pas d’ti din l’avion, in n’mont’ra pas non pus.
T : Et té t’aros artrouvés tertoutes au violon.
G : M’téte bin !…..Ed su ç temps là, Georges i avot arpéré deux chinois qui mettot’ té des loïens autour des valises. In n’d’avot justémint eine qu’al avot pris un borgninr pindant inr ed nou voïache. In avot toudis peur qu’al sé ouèfe.
Bon qu’i dit Georges èj m’in vas les vir. I fait cheinturer les deux valises, deux précauti-inrs i val’té mieux qu’eine ! Mais v’là qu’inr des dux imploïés i li fait comprind’ qu’i li dot vingt yuhanns.
T : Cha f’sot combins ?
G : Eine milette ed moins qu’vingt francs.
T : Bah ! Cha povot cor d’aller.
G : Ouais, mais in n’avot pus doupes chinois. In avot tout dépinsé esprès. I n’nous restot pus foque un yuhann
T : Et alors ?
G : Alors ? Georges i a d’mandé l’aumône. Mais i n’d’a pas eu assez ! I n’volot pas d’aller imbéter Danièle et pi Denis qui s’débattot’ pou dégrinquer Brigitte. Du fait, in lieu z’a donné à chacun eine pièche ed dix francs !
T : Et i s’sont contintés avec cha ?
G : Ouais, i z’artournot’ el pièche in rigolant. I avot un mille gueules avec nous qui lieu disot : ‘’ bonne monnaie ! Franc lourd ! Très lourd ! ‘’.
T : I l’ont sur’mint gardée pour eusses.
G : Asseuré. Mais i n’ont pas fait fortune avec cha. El pus rigolo ch’est qu’i n’d’est arrivé un trosième qui étot jaloux.
T : Té ni in n’as pas donné eine ?
G : Pour mi té seut, ti ! Jé n’sus pas la banque de France !
T : Final’mint, tout i s’a bin fini !
G : Pou certains, ouais. Mais i n’d’a, i tot’ à peine arvénus à leu masinr qu’i z’avot’ arnioque.
T : El tourista ?
G : Sûr’mint ! Avec eine fièfe ed quéveu et des douleurs ed taveu leu corps. I n’d’a même inr qui a maigri d’six kilos !
T : Ti, t’as rin eu ?
G : Ninr, in est à n’eine quinzaine à y avoir écappé.
T : Pourtant t’avos mingé et bu tertoutes el même.
G : Din l’avion Shang Haï-Paris i nous avot’ té proposé un déjeuner chinois et inr occidental. I faudrot vir cha d’pus près. Si cha tompe, ch’est les cheux qui ont mingé chinois qui ont eu l’coeup d’beus.
T : Té vos, ch’est comme èj té dis à chaque fos : i vaut mieux rester à s’masinr, acouter les histoires des eutes, raviser les films et les photos, in est pus in sécurité et pis cha coûte moins quèr !……..

Gisèle RAVERDY +