Au marché d’Aulnoy, Gisèle rencontre son amie Thérèse...

Voilà plus d'une heure qu'elles parlent du voyage en Chine que Georges et elle, faisant partie d'un groupe d'Arenvaleux...
Justement, Georges !... Il attend et s'impatiente. Gisèle avait dit qu'elle ne ferait qu'un saut au marché, rapidement... Et on sait qu'il n'aime pas attendre...
Mais Thérèse insiste, alors il faut bien raconter encore...

Alors, voilà!

                            LA CHINE   (Deuxième partie).

                                                                                               .    
G : Tout cheu qué j’n’ai pas appris ! D’autant pus qué Denis i ténot tous les rôles, comme cha in comperdot mieux. Au temp’ du ciel, i juot à l’emp’reur, i montot d’su l’cailleu sacré, i hauchot ses bras. D’temps in temps i mélangeot l’z’années : i serrot s’poing au-d’sus s’tiête comme ichi in trente six, au front populaire.
T : Les chinois i veyot’ té cha ?
G : Bin seur, et cha les f’sot rire !……
T : I n’riot’ té pas jaune ?
G : Même pas ! Ch’est t’dire si i z’y mettot’ té dé l’bonne volonté. Mais din l’cité interdite ch’est nous eutes qu’in a ri jaune. A n’in certain momint, i z’ont tout serré pace qu’y avot des heuts plachés qui allot’ té sortir et la motié d’nou groupe i est resté prisonnier. Pour eine fos, Georges et pi mi, in étot du bon côté.
T : Cha a duré longtemps ?
G : Pas d’treup. Eine demi-heure. Mais pindant ç temps là in a té pris d’asseut pa les vindeux d’souv’nirs. Pas moïen d’s’in débarrasser !
T : Qu’est-ce qu’i vindot’ exactemint ?
G : Des cartes postales, des foulards, des capieux d’papier, des pinceaux, et j’in oblie…..I nous avot’ incherclés et i criot’ : dix fancs ! dix fancs ! Et pi, tout d’un un coeup, j’ai sintu quéqu’inr par drère èm deus, qui m’pochénot m’n’épeule drote, d’su s’temps qui m’glichot pa d’vant m’nez un cartinr ondulé dus qu’y étot marqué : MASSAGE.
T : Té n’d’as pas profité pou sogner tes douleurs ?
G : Té pales ! Au mïeu du qu’min ! Et in pus, quand èj m’ai artournée et qu’j’ai vu l’bonhomme, cor deux coeups èj m’aros sauvée. I étot noir comme un fouant !
T : I t’a foutu la paix ?
G : Quand i a intindu m’cri, i n’a pas insisté et i s’a mis d’su l’pieu d’Alain. I li a fait eine paire ed bonnes pinchettes din s’cou.
T : Cha li a donné du plaisi ?
G : Sur’mint pas. I s’a foutu in fourfale !
Enn té mets pas in fièfe qu’al i disot s’fème. Ej l’ai li din l’guide : té vas perd’ la face ! Et alors qu’i li répondot, qu’est-ce qué j’in ai à fout’ mi ! Jé n’su pas chi v’nu pou crâner. Jé n’veux toudis pas qu’i m’touche.
T : Et vous avez quand même fini pa vous dégrinquer d’tout cha ?
G : Ch’est l’autobus qui nous a sauvés. Quand les eutes i z’ont té libérés dé l’cité interdite, in s’a bin vite infutés din l’autobus qui arrivot à ç momint là. Et même à travers du carreu i nous moutrot’ té cor leus fouf’teries.
T : Quand i z’ont quette cosse à l’tiête, i n’l’ont pas ailleurs.
G : Ej té cros ! I vont s’qu’à grimper d’su l’muralle de Chine et quand in arrife au trosième bastion i nous saut’ eddsus pou nou vinde un certificat dus qu’i est marqué qu’in a monté l’muralle.
T : Té n’l’as pas acaté ?
G : Cha coûtot trente francs. Ej leu z’ai dit qué m’certificat y avot longtemps qué j’l’avos eu !
T : Et i t’ont compris ?
G : Sûr’mint pas. Mais in n’savot pus quoai invinter pou s’déraquer . In a même fait parler Charles in polonais. Mais d’toutes façons in tot rattaqués pa les vindeux d’cartes, ed timpes, ed vraies foeusses pièches ed monnoaie.
T : Commins qué té t’y perdos pou leu fausser compagnie ?
G : In essayot dé s’glicher inter eusses. Alain i leu faisot des grimaces, eusses i li in arfaisot’.
T : Des vrais infants.
G : Et cha continuot quand in ardéquindot. A n’in momint donné, i n’d’avot quate qui m’attindot’ in bas dé l’côte. I m’barrot’ té l’quémin.
Attati-inr à ti, qui criot’ Alain et Georges qui avot’ té réussi à leu z’écapper. Té n’vas pas y coper.
T : Et alors ?
G : Alors, j’ai fait l’avion : j’ai écarté mes bras et j’ai coeuru in fonçant d’su r’eusses.
T : Et cha a marché ? T’as su t’arrêter ?
G : I s’ont arculés. I tot’ té tout saisis. Jé n’tos pas d’treup rassurée, j’ai freinée in piétinant et pi j’m’ai raccrochée à m’n’homme.
T : I n’dot’ té pas vir cha tous les jours : eine grand-mère qu’al sé prind pou n’un planeur.
G : El pus contint, cha té Charles. I arrivot derrière mi et i a profité d’leu n’étonn’mint pou passer comme eine fleur.
T : I vous arrife toudis des tours à part des eutes.
G : El pus bieu cha té l’visite du marché nocturne dé l’norriture.
T : I vind’ à minger à l’cour par nuit ?
G : Et feut vir queu minger ! Des brochettes ed jonnes d’osieux, d’osieux adultes, ed queues d’scorpions, d’cocons d’viers à soie, d’saut’relles, ed poulpes.
T : Queune pourcheaut’rie !
G : I avot un grand couet d’huile boullante et i trimpot’ el brochette ed din eine paire ed minutes.
T : Vous n’d’avez acatés ?
G : I n’d’a inr qui a mingé du poulpe. L’huile al guillot. I d’vot pencher s’tiête pou n’pas espiter ses loques. Et i maclotot les tintacules.
T : Cha n’tot pas fort appétissant.
G : Georges i étot écoeuré. Es cœur i honqu’tot. D’ailleurs i a cangé d’trottoir rapport au sintimint d’huile boullue et arboullue.
T : Queu nactieux !
G : Par cont’ Nicole, al tot pas dégoutée. Al volot à toutes fins toutes forches, minger quette cosse.
T : Al n’avot pas soupé ?
G : Si, mais al crèfe toudis d’faim. Al ravisot les brochettes , mais quand al a vu l’vindeux qui éternuot un bon coeup d’sus, al a continué s’quémin et al a quéu in admirati-inr pa d’vant un plat d’soja in salate. Al a bin vite crié après s’n’homme.
T : Pourquesse ?
G : Ch’est li qui avot les doupes. Alors Nicole al a moutré l’soja à l’chinoise. ç telle chil al a pris un ratinr tout blanc, al a artourné eine palée d’soja au mitan, al a roulé l’ratinr, al l’a ploïé, imbarbouillé d’un jus tout noir et al l’a à motié inv’loppé din du papier dé l’même couleur qué l’rati-inr.
T : J’ai eu peur. J’ai cru qu’ch’atot dé l’même couleur qué l’jus !….Alors, Nicole, al a tout mingé ?
G : Té n’cros pas si bin dire. Al a même avalé l’papier.
T : Queulle désivorante.
G : Au début, s’n’homme i essayot dé l’débouser : ènn minche pas cha ! Cha té cuit à l’huile qu’al est mate ed boulir ! El sauce noirte èj sus sûr qué ch’est l’ieu qu’al a servi à laver les léguèmes !
T : Et al n’a pas arnonché ?
G : Bin ouète. Al disot : cha pique un m’tieut cosse, mais ch’est fin binr.
Charles i armettot deux sous à l’viole : té vas attraper arnioque. Ej vas avoir du patieu avec ti par nuit. Pou s’arvinger al mordot d’pus belle din s’rati-inr.
T : Et ch’est comme cha qu’al a mingé l’papier.
G : Ouais ! Comme i étot dé l’même couleur qué l’rati-inr al n’a rin vu.
T : Al arot quand même pu l’sintir. Mi, m’grand-mère al disot : té minches du papier, té vas chier des rubans.
G : Ichi, cha n’a pas té s’qu’à là pace qué pou t’dire la vérité Charles i sé n’d’a aperçu à temps et i a crié : attinti-inr, té minches el papier !
T : Ch’est un bon homme, i est bin alintour dé s’fème.
G : Ouais. Mais i n’a m’tète pas quèr les rubans…….Alors, Nicole, tout in crachant l’papier d’su l’quémin al sé délamintot : a cause ed cha, èj vas ète din l’rapport in patois.
T : Ch’est pou cha qu’t’as té obligée d’in parler pou n’pas l’faire mintir.
G : Mais tout cheu qué j’viens d’chi t’espliquer rapport au marché, ch’est rin à côté d’cheu qu’Gismonde et Maurice i z’ont vu à Canton.
T : Qu’est-ce qu’i faisot’ euzes deux à Canton ?
G : I n’tot’ té pas avec nous. I z’avot’ té chosi un chircuit avec un clup.
T : Et alors, qu’est-ce qu’i z’ont vu ?
G : Au marché, in pus ed tout cheu qué j’t’ai dit, y avot des guioles pleines ed rats qui attindot’ d’ètes estoqués et mingés.
T : Sur place ?
G : Ninr, in leu faisot leu n’estafe ed vant l’client qui les imm’not’….. Et pi, des crapeuds, aussi greus qu’al tot, au momint d’camper el gernoulle qu’al volot s’faire aussi grosse qué l’boëf….
T : Té n’m’as pas cor parlé des serpents.
G : Treize à l’douzaine qu’i d’avot ! Quand i avot un amateur, el vindeux i in tuot inr, il widiot dé s’sang qu’i mélangeot avec ed l’alcool.
T : Et i n’d’avot qui buvot’ té cha ?
G : Cha leu sert ed ‘’ vas-y pépère ‘’.Ch’est l’viagra chinois.
T : I paraît qu’i z’ont toudis té forts pou tout cha. Mais in n’sait pas si i n’d’ont vraimint d’zoin o bin si i veut’ té leu surpasser.
G : I vont même esqu’à vinde des louloutes ed quien !
T : In brochettes ?
G : A l’pièche. Et ch’est qu’cha coûte quèr ! Ch’est cor un vas-y pépère.
T : Eh ben ! A côté d’cha in a bel air avec nous morcieux d’céléri pou les vieux maris.
Et dé l’viande ed quien, vous n’d’avez pas mingée ?
G : Ch’atot hors ed prix. Ch’est pou les malates et l’z’infants. Mais pour arvénir à Gismonde ses ch’veux i z’ont derché d’su tiête, quand al a vu qu’i vindot’ té des cafards au kilo, et surtout quant al a su qu’ch’atot pou faire dé l’soupe. Al s’a rappelé ed d’avoir mingé l’velle. Al avot bin vu des m’tiotes saquoais noirtes qui nageot’ té d’din, al avot pris cha pou des champigninrs ; mais ichi, al avot un doute ! Et un rute doute.
T : Cha arot croqué, si ch’avot été des cafards.
G : Té sais, à forche ed boullir ed trimper, el carapace al arot ramolli. Toudis est-il qu’i sont rallés à l’hôtel complét’mint défoutus. El guide al volot les rassurer in leu jurant d’su l’mémoire ed Confucius et Lao-Tseu, et même ed Mao qu’i n’arot’ té rin d’tout cha à minger !
T : Mais malgré cha, èj sus seure qu’i z’ont eu l’appétit copé.
G : I z’ont fait gnin-gnin d’su tout. In pus ed cha, el lind’main in leu z’a servi in intrée du fromache ed soja fermenté. A côté d’cha l’maroilles coulant ch’atot d’l’ieu d’rose. I z’ont té rassasiés, rin qu’à l’odeur.
T : Ch’atot eine cure d’amaigrich’mint !…..

Gisèle RAVERDY +