Le café de Roger

Les péqueux d’l’Arenval tot’ té d’allés avec leu fème, passer eine sémaine din les Charentes in mason familiale au bord ed la Sèvre Niortaise.

Mais in arot dit qu’y avot eu du passe-drot! I n’d’avot qu’i avot’ eine cuisine équipée, eine tape, des cayères, un divan, quate lits et pis eine salle de bains, bin seûr ! Par cont’ el z’eutes i n’avot’ té foque eine campe à couquer et eine salle de bains.

Din les deux qui avot’ té té avantagés, y avot Roger. El pus contint qué j’sus, qu’i avot dit tout d’suite, ch’est qu’j’ai eine caf’tière! Pace qué mi, el première affaire qu’i m’feut quand èj m’élièfe, ch’est m’goutte ed jus. Mais l’pus pire ch’est qué j’n’ai pas d’café. I ara bin eine fème qu’al ira mé n’d’acater!!!

Alors, là, tout d’suite les fèmes des péqueux i s’sont proposées. Quand i sont arrivées din l’grante surface, ed d’vant l’étalache des paquets d’café, i z’ont t’nu eine grante discussion : queulle marque qu’in va printe ? I feut acater du moulu, et du bon ! Roger i a bin insisté qu’i n’volot pas d’chirloute.

Alors i z’ont ravisé les prix, les pourchintaches d’arabica. Quand i n’tot’ té pas seûres qué ch’atot du moulu i pochénot’ té l’paquet pou bin sintir el pourrette. Au bout d’un quart d’heure i z’avot’ té chosi.

       Et des filt’ ? qu’al a d’mandé Marie-Françoise, i n’mé n’d’a mie parlé !

Alors, là y a cor eu des hésitations. In n’d’acate ? In n’d’acate pas ?

        Final’mint, i z’ont décidé d’printe el pus m’tieut paquet. Si i n’in veut pas, in l’gard’ra !

Quand i l’z’a vues arvénir avec tout cha, Roger i a té tell’mint contint qu’i leu z’a fait eine grosse baisse. I z’étot’ té justémint quéues d’su l’marque ed café qu’i perdot à Sars et Rosières! Et i z’avot’ té pinsé à les filt’ alors qu’i avot oblié d’in parler! Cha, ch’atot des fèmes! Din l’tas i n’d’a un qui a avanché : ‘’ Roger, pus qué t’es si bin équipé, tous les jours au matin, in attindant huit heures un quart pou déjeuner, té porros pétète nous faire eine bonne tasse à tertoutes ‘’.

Roger, bon garchon, i a té d’accord tout d’suite.

-Ouais! mais v’nez pas tertoutes in même temps, pace qué j’n’ai foque six tasses !

El lin El lind’main matin, à l’première heure nou comarate i préparot ès jus. El premier qui s’a amoutré, cha té Luc. El café ch’atot du saute à l’clinche, à coper au coutieu, bref, à révier les morts. Luc i n’s’attindot pas à cha! Es cœur i n’d’a honqu’té ! Charles qui est arrivé après i a eu l’même tour !

Et les eutes ? Ben, les eutes i n’ont pas onsu y d’aller ! I z’ont cru qu’ch’atot pou rire !… Alors, Roger, i a toudis attindu les clients et i est d’meuré avec es telleut d’café. Quand cha s’a su, el lind’main cha té l’défilé din l’cahute ed Roger. Mais li, i étot tout d’eine : ‘’ vous avez manqué dé n’pas avoir ed jus. Tout i s’a artourné. Ravisez, ch’est tout cheu qui resse dé l’caf’tière ’’. Et i a moutré l’cherque ed fier qui intourot l’peut d’verre. Beh! Commins qué t’as fait t’compte ? qu’i li ont d’mandé. ‘’ D’abord, èj n’ai pas bin dormi. J’étos  pourtant bin arcrant. Ej m’avos couqué, j’avos branché l’apparel pou sogner m’n’apnée du sommel et j’étos quéu comme eine masse. Tout d’un coeup au mitan dé l’nuit v’là qué j’mé réville in sursaut : j’intinds eine tempête ed dièpe ! Nom des os, qué j’mé dis, el vint i souffièle dur, i va décorner les boëfs! Ej vas mé l’ver boire un coeup, j’ai chi m’gasieu complét’mint desséqué. Là, j’débranche èm n’apparel et v’là ti pas qué l’vint i quet du même coeup ! Ch’atot ç fouf’t’rie là qu’al faisot tout ç potin !!!. Après avoir bu un verre d’ieu, èj m’ai arcouqué, èj m’inbrunquot quand j’intinds un randouillache qui m’fait sauter in l’air. Ej m’élièfe ed feulté pace qué j’pinse qu’ch’est quéqu’un qui vient voler mes lines ed péque. Arrivé din l’cuisine, èj vos l’vasistas du heut tout grand ouvert. Ch’est li qui m’avot foutu eine frousse bleusse. Jé n’povos pas l’arserrer, i arot faullu monter d’sur eine cayère et j’aros passé à travers ! J’ai cor toudis té m’arcouquer et j’n’ai pus su m’rindormir avant bin longtemps !.

Ichi, quand èj m’ai l’vé, i faisot eine frodure ed leu. Alors j’ai branché l’radiateur électrique, et pis j’m’ai occupé du café. J’avos bin fait l’z’affaires ! J’avos mis l’caf’tière d’su un platieu et l’platieu d’su l’plan d’traval. Mais, l’chauffe-eau i génot, alors j’ai ravanché l’platieu et là i dépassot d’l’aumère. J’ai mis l’ieu, l’pourrette, j’ai appoïé d’su l’bouton et j’sus d’allé m’laver. J’comminchos à m’ressuer quand j’ai cor toudis intindu du potin. J’ai accoeuru din l’cuisine. Et là !!! Myard polyte !!! Queu dallache !!! Tout i étot artourné par tierre, i avot des marcs ed café tout t’taveut dé l’pièche, même din mes cauchures. Ichi, dit in passant, èj n’ai pas d’chance avec mes cauchures à ç momint chi. Avant dé v’nir à l’péque j’ai passé mes baskets à l’batteuse, pace qu’i z’étot pleines ed berdoulle et qui puot’, in m’a dit qué j’povos. Mi, pou bin les rapproprier, j’les ai mis à quatre vingt dix degrés. Ej z’ai artrouvées in quate morcieux..

Pou arvénir à m’n’histoire ed café, y avot du verre din tous les coins. Ej l’ai ramassé et foutu à l’poubelle. Après, j’m’ai occupé des marcs ; i nangeot’ din l’jus, èj z’ai jétées din l’lévier. Après, i m’a faullu loqu’ter par tierre. Cor héreux, y avot eine loque à loqu’ter ; avec mes écisieux d’péqueux, j’l’ai copée in deux. Du même coeup, j’ai eu eine wassingue et eine lavette. Avec l’eine, j’ai nettié par tierre et avec l’eute j’ai nettié l’lévier. J’ai arcomminché l’café, mais comme èj n’avos pus d’caf’tière, j’ai pris un peut in fier qué j’ai trouvé din l’aumère.

In a donc bu tertoutes el jus d’nou comarate Copin, mais bin seûr par groupe ed six, pusqu’y avot foque six jattes. Intre temps Roger i l’z’arlavot et i les ressuot avec ès n’essuie-mains…..qui n’servot qu’à faire l’vaisselle.

In tout cas, ès café i étot fin bon ! Pou l’récompinser Jacques i li a t’nu l’rond d’fier dé l’caf’tière cassée au d’sus dé s’tiête et i l’a baptisié : Saint Roger !

Bin seûr, i avot gagné nou clientèle et tous les jours au matin el cahute ed Roger ch’atot l’rattind tout. Geneviève al a dû d’aller racater un paquet d’café : les gueulards i z’avot’ té tout chuché .

In espère bin tertoutes arjuer l’pièche l’année qui vient !

Gisèle  RAVERDY