Du momint qu’is sont arvénus des Charentes, les péqueux d’l’Arenval  is z’ont té leu vanter din tous les coins ed tout cheu qu’is z’avot’ attrapé comme pissons din l’canal et pis din l’Sév’ Niortaise ! A l’z’acouter is z’in avot’ arsaqué des bareux et is z’in avot’ même norri el mitan du villache ed Marans pindant eine sémaine !

In intindant cha, les péqueux qui n’y avot’ té pas té is z’ont manqué d’leu rind’ malades ed jalous’té et is s’sont bin promis d’leu z’inscrire pou l’séjour pèque l’année d’après !

Ch’est rapport à cha qué d’seize in Charentes, in s’a artrouvé à vingt-chinq in Bourgogne, el mardi 10 juin 2003. Faullot vir nous péqueux c’mmins qu ‘is z’étot’ équipés ! In arrivant, is z’ont rimpli l’cav’ dé l’mason familiale avec leu matériel. Et lind’main, à l’première heure, is z’estallot’ té tout au bord ed d’ieu : des seyeux d’amorces, des asticots d’tout’ les couleurs, des bocals ed tierre pleins d’viers, du blé, du chanv’, du maïs et pis tout cheu qui muchot’ pou n’pas livrer leus secrets. Faudrot pas oblier les cannes à pèque in plusieurs morcieux qu’is z’instiquot’ comme i volot’ les uns din les eutes.

Fernand pou mett’ tout cha, i avot eine inv’loppe in arot dit l’étui d’eine contrebasse ! Pou n’un musicien, ch’est normal ! Et leus cayères ! ! ! Cha d’allot dé l’caisse à matériel esqu’au sièche qui avot un sac qui li poindot pas d’zous, in passant po fauteul à lattes réglape à tout momint ! Là, in arot dit des péqueux du club MED !…. I n’d’a qui avot’ té même eine pétiote tablette duss qu’is déposot’ leus m’tieuts peuts rimplis d’biêtes qui s’verténot’….

Et les pissons din tout cha ? Ben, les pissons is s’pourménot’ in famile, o bin inter copains et copines, is rif’tot’ les lines, mais, pas biêtes, is n’mordot’ té pas aux ham’chons ! Les péqueux i s’énervot, i s’délamintot’ i s’débousot’.

El pus pire, ch’est qué l’mason familiale al tot au bord ed l’Yonne. Comme i faisot eine caleur à créver, tertoutes i dormot feurniètes et volets ouverts. Mais les carpes, i l’avot’ té vu ! Alors, tous les nuits ces sales biêtes is v’not’ té narguer les péqueux : is sautot’ té din l’rivière, is plongot’, is z’armuot’té l’ieu. Alain, i intindot cha, i n’d’arot brait ! I s’arot bin l’vé pou essayer d’les péquer, mais, par nuit, din l’noir cha i foutot eine milette la frousse… Alors, au lieu d’compter les moutons i comptot les pissons, i finissot pa s’indormir mais ed tout’ ces carpes, i in rêvot ! I n’les péquot pas ! Ed rache i l’z’étronnot !

Y avot oussi eine seule péqueusse : Michéle. Du premier jour qu’al a péqué in attindant patiemmint un mordache, al a vu din l’rivière el deus d’eine biête à poils, eine tiête à moustaches, mais pas moïen d’distinguer s’queue. Alors, sans vir el queue, commins volez-vous trouver l’nom d’un mammifère ? Au dêner, Michéle al a d’mandé l’avis d’tertoutes. Après bin des discussions, is z’in ont déduit qu’ch’atot un ragondin. . . .

Les jours i passot’ et l’bilan i n’étot pas greus : eine paire d’ablettes, des épénoques ed guleu, eine pétiote carpe !… Les péqueux i s’cachot’ des excuses : i fait d’treup coeud, is sont in train d’frayer, y a les nounous des arb’ qui quèt’ té din l’rivière, des éphémères qui s’laiss’t’ té minger….. Leu moral i étot à zéro !!!

Et pis, y a eu l’jour du concours au villache d’à côté. Jean-Claude i a téléphoné au responsab’. Ç ti chil, i étot contint d’avoir des candidats ! I étot prêt à tous les arring’mints : nous comarades, selon l’heure ed leus erpas, i povot’ arriver après l’ouverture du concours, leu z’araller quand is vodrot’, arvénir après l’dêner à n’importe queulle heure. Jamais in n’avot vu quéqu’un d’pus conciliant ! Et y avot dix lots à gagner ! La, ch’atot un rude dallache : un lot pou l’pus greus pisson dé l’journée, un pou l’pus greus pods d’pissons du matin, un pou l’pus grand nomb’ ed pissons dé l’journée, un pou l’pus vieux péqueux !……

Nous z’hommes is z’étot’ té tertous partants…..ou presque…. Y avot foque Jacques H. qu’i n’volot pas y aller : mi, j’aime pas les concours, qu’i disot. Cor héreux, Jean-Claude i a eu eine bonne idée. I a trouvé din l’quémin, in allant à Villeneuve eine grande étiquette avec un numéro écrit edsus. I l’a ramassée, et arrivé à l’mason familiale i a fait croire à Jacques qu’i étot inscrit au concours et qu’ch’atot l’numéro dé s’plache. Du fait, el lind’main matin, tous les péqueux is méttot’ in route !

Au soir, Fernand i est arvénu in hauchant eine belle coupe bleusse argintée : i avot eu l’premier prix : el pus greus pisson d é l’journée ; 340 grammes. Ch’atot d’ailleurs ès seule et unique prise. I avot manqué dé l’louper. I l’avot mis à côté dé l’bourriche ! El pisson i in avot profité pou s’arglicher à l’ieu. Alors, Fernand, à quat’ pattes, cul à buse i l’avot rattrapé d’justesse, à l’main, bin seûr. I paraît qu’ch’est l’méthode ed pèque des ours !

Après Fernand, ch’est Luc qui est arrivé avec un bieu pisson in plât’ rose saumon racouvert ed nervures presqué fluo : deuxième prix qu’i avot eu ; el pus greus pods d’pissons du matin ; 120 grammes !…

Et pis cha té Eugène : trosième prix, el pus vieux péqueux. Jean i étot jaloux, à n’un mos près, ch’est li qui l’arot eu !…

Pou in finir, quatrième prix, Alain : el pus grand nomb’ ed pissons. El pus contins qu’is z’étot’ ch’est qu’tous ces pissons in plât’ i tot’ té fort décoratifs ! Is z’allot’ té povoir les estaller aussi bin edsus un bahut moderne qué edsus un ancien !

Infin Georges i est arrivé : in shorc, torse nu, chéveux arcollés, à chacun d’ses pas cha f’sot floc floc din ses sorlers. I t’not s’maronne d’eine main et s’maillot d’l’eute : i avot quéu à l’ieu ! I paraît qu’i péquot à l’invers in tournant l’deus à l’rivière. I armettot un asticot, i a gliché et i s’a artrouvé au jus. Ch’atot fort profond, heureus’mint i sait bin nanger. I a un tas d’fèmes qui l’ont vu, qui s’sont mis à crier, à coeurir, mais i s’a fort bin débrouillé tout seu. Charles i a té li arquèr un shorc din l’auto et i s’a cangé publiqu’mint. Malgré cha i n’a même pas eu un lot d’consolation !… Ch’atot pourtant l’pus grosse pièche qu’al avot sorti d’l’ieu dé l’journée !..

Edsus l’temps qu’is faisot’ leu pèque miraculeuse, nous, les fèmes, in tot d’allées au villache leu z’acater du matériel ed pèque pace qué ch’atot la fête des pères et qu’in avot décidé d’organiser eine lot’rie. El vindeux i nous a même donné un cadeau : deux colliers. Des colliers, du matériel ed pèque qué vous allez dire ! Ouais, mais ch’atot des colliers porte-bonheur ! I n’d’avot même un avec des feusses gueuques arséquées. Donc, après avoir félicité les vedettes, admiré les lots, in a tiré à l’buquette. Ch’est Jacques N. qui a gagné l’premier lot : un greus engin pou lancer d’l’amorce au lon. D’toute façon, is z’ont eu tertous quette cosse, au moins eine boisson au choix. In leu z’a même canté eine canchon qu’in avot invintée. In n’s’avot pas foulé pou trouver les paroles. I avot pas grand cosse qui rimot, mais in avot pinsé qu’in cantant vite, i n’sé n’d’apercévrot’ té pas.

V’là tout cheu qui s’a passé pou l’pèque. Côté mason familiale, in a tertoutes des belles cuisses pace qu’in nous a servi beaucoeup d’carottes. Des carottes ! Charles, rin qu’à vir el plat, i attrapot eine crise d’asthme. Alors, un jour, el serveuse al i a dit d’attind’ qu’al allot i rapporter un eute léguème. In fait d’léguème, i a eu des pâtes…. Des pâtes comme les cheux qui avot’ té té in Italie l’sémaine d’avant…

Pou l’confort, tout allot bin. Sauf qu’un coeup, i avot faullu rind’ les serviettes et les draps d’bain pou les laver. El mason al n’tot pas fort bin équipée, pace qu’in d’vot attind’ qué l’lessive al fuche finie et séquée pou ravoir les serviettes. Michèle al n’a pas fait attation et in arvénant dé l’péque toute crute ed coeud al s’a bin vite instiquée pas d’zous dé l’douche et au momint dé s’ressuer,al n’a rin trouvé : al a té obligée d’coeurir din les couloirs pou s’séquer. A les dernières nouvelles, personne i n’a perdu la vue !…

Quand l’séjour i a té fini, tertoutes i n’d’a ardémandé.
Pauv’ Jean-Claude, i a cor du pain edsus l’planque. Alors, l’année qui vient, cha s’ra quoai ?
La Normandie, o bin la Solone ?