Comme beaucoeup d’gins après l’deuxième guerre, et surtout din les fil(l)es, Josette al avot arrêté l’école à quatorze ans. Contrair’mint à l’plupart des eutes, al n’l’argrettot pas.

Bin seûr, al in veut à ses institutrices ! I n’savot’ té pas leu z’espliquer ! Ch’est pou cha qu’al avot té si dure ed comperdure.

D’abord, al l’a cor intindu à l’télé l’sémaine passée : y a pas d’mauvais éléfes; y foque des mauvais maît’.

Cha prouf’ qué d’pus s’temps à elle, y a rin eu d’cangé.

Al a bieu cacher din s’tiête, y a pas eine matière qu’al ni laisse pas ed mauvaises souv’nances. A c’mmincher po calcul. I n’avot’ té pas huit ans qu’i d’vot arcopier ç mot là au mitan dé l’line du cahier du jour et carculer leus opérati-inrs pa d’zous. Al avot justémint bin du passe-temps avec ses majuscules. Eine malhéreusse fos al avot écrit un ‘s’ majuscule au lieu d’un ‘c’. Cha s’comprind ! Y a foque el crolette qu’al canche. L’inr i l’a à gueuche, l’eute à drote. Queune histoire pace qu’in lisot Salcul ! Es n’institutrice al li avot souligné tros fos in rouche. Al li avot marqué " étourdie " din la marche, al li avot passé inr savinr pas possipe et al li avot donné chinq lines ed ‘c’ majuscule à écrire pindant l’récréati-inr !!!!!

Mais l’pus pire, ch’atot les problèmes. In y parlot au pus souvint d’eine certaine Eva Dupont.
I l’ont traînée avec eusses ed sept ans esqu’à quatorze ans. Ç telle lal ! Queulle sale pieu ! Queulle effoufiée ! Queulle brissaudeusse !….Al n’in loupot pas eine. Et ch’atot à eusses à leu casser leu tiête pou carculer cheu qu’al avot justémint brissaudé. Al tot toudis pindue au tonnieu dé l’cafe avec un peut pou l’rimplir ed pinard.

Mais, un coeup al n’ravisot pas à s’n’ouvrache et al laissot tout déborder, o bin, al arserrot pas bin l’robinet et i gouttot pindant des heures. In pus, al n’étot jamais foutue d’armonter les escaïers sans in fout’ par tierre. A chaque fos i d’vot’ trouver l’volème du pinard répandu. Cor héreux qu’al n’a jamais eu l’idée d’boire un coeup directémint au peut ! I z’arot’ té cor té obligés d’cacher l’cont’nance dé s’gasieu. Tous les jours Josette al s’y attindot ! Ch’est pou cha qu’al arpassot din s’tiête el formule du chylind’ avant d’rintrer din l’classe, quant al tot in fin d’étutes.

In y réfléchissant bin, ch’atot quand même un rute buvatier, l’père Dupont pou toudis invoïer s’n’infant au tonnieu comme cha ! I arot acaté du vin au lit’ cha les arot arringés tertoutes. Eva autant qu’eusses…..pace qu’al d’avot là un air el pauf’ infant.

In pus ed cha, l’père y avot un rute défaut : i feumot comme un houzard !!!! D’après cheu qu’i invoïot quèr à Eva, din l’masinr cha dévot funquer dur. Al acatot des paquets d’toubac avec des fuelles pou l’sémaine, des chigarettes tout’ faites pou l’dimanche et les jours ed fiête. I li donnot autant d’doupes et ch’atot cor à l’z’élèfes ed trouver si y n’d’avot assez, ed treup….et combins !!!!

Tant qu’i z’y étot’ i d’vot’ carculer cheu qui s’in d’allot in feumée d’su l’mos, l’trimess’, l’année. Après cha, convertir el toubac un biefteaks, in paires ed cauchures, quand cha n’étot pas in sacs d’peunn’ tierre ed chinquante kilos.

I paraît qu’ch’atot volu pou qu’i déviench’t’ des adultes économes. Josette cha l’a puteut dégoutée d’faire arvénir du pinard au tonnieu et pis, pus tard, cha l’a intraînée din des scénes ed ménache. Es n’homme i l’traite ed rapiat, ed d’gueularte quand al armarque qué les doupes ed tros plaques ed chocolat i s’sont involés in feumée, rapport à li et à ses chigarettes….

I tot’ à peine débarrassés pou l’journée d’Eva Dupont, qu’i s’appoïot’ eine dictée à rallonches, o bin des exercices ed tous les sins, d’tous les sortes,même des cheux à treus. Ces lal, i les décachaulot’ din tous les coins : in grammaire, in conjugaisinr, in vocabulaire et même in écriture.

Là, i li a cor arrivé un sale tour……..I faullot trouver l’bonne majuscule ! Y avot donc un point au début d’chaque mot. V’là qu’al quét d’sur un point sieuvi pa ‘aronne’. Al essaie tous les lett’ ed l’alphabet et à s’n’idée qué chez l’M qu’al dot chosir. Al écrit donc Maronne.

Myard Polyte!!! Qu’est-ce qu’al a pris à l’correcti-inr : ch’atot Garonne !!!!

Qu’est-ce qu’al d’avot à fout’, elle, dé l’Garonne à dix ans. Ch’est tout juste si al savot l’ninr dé l’rivière d’Auno.

Comme ès mère al i disot toudis : occup’té d’tes maronnes, ech’ t’à ti, quand al mettot s’nez dus qu’i faullot pas, ici al avot cru bin faire, al s’in avot bin occupé. Au bout du quinrte, al s’a artrouvé avec Garonne à copier vingt chinq fos !…..Al s’a bin promis dé n’jamais d’aller l’vir, ès fouf’trie là ! Et même à ch’t’heure qu’al a les moïens, al a cor pus quer ed rester à s’masinr.

I n’avot’ té pas d’zoin des exercices à treus pou s’faire avoir ! Eine fos, el demoiselle d’école al avot d’mandé d’mette à tous les personnes : la chenille rampe et léve la tête. Es compenne à huit ans, al avot marquée : nous rampons et nous levons la têtons, vous rampez et vous levez la têtez ! I arot faullu tout savoir ! I z’avot’ té bieu cacher din leu tiête i queyot’ té souvint à côté.

I n’étot’ té foque ed z’infants d’villache nés juste avant la guerre.. Alors, quand i z’étot’ assommés d’questi-inrs : qu’est-ce qu’un marmiton ? I busiot’ : din marmiton, in intind ‘marmite’. D’allonnes-y !

- un marmiton, c'est une petite marmite !

- faux !

Qu’est-ce qu’une bannière ? Là, in intind ‘bagne’

- ch'est des loques ed bagnards.

- faux !

Y avot d’quoai ét’ découragés d’essayer d’réponte quette cosse. Eusses, ed ces mots là, i n’d’avot’ té jamais intindu parler. Pas d’pus qué ‘majordome’ qué Bernadette al avot écrit : mangeur d’hommes ! Qué néanmoins qu’Mauricette al avot mis in tros morcieux : nez en moins !

Et cha y d’allot les chinquantes fos à copier. In géographie les imbroulles i continuot’…..

Là, l’demoiselle al avot espliqué : la France possède plusieurs bassins : parsien, aquitain et pis cor…et pis cor…..

Josette, à s’masinr comme chez ses amisses, i n’avot’ pas d’salle ed bains; i s’lavot’ tous les jours din un bassin et l’sam’di din l’caudrinr. Alors, al s’a d’mandé cheu qu’i foutot’ té là tous ces bassins ed t’aveu la France. Pourquesse qu’in faisot tant d’histoires qué cha, alors qué tertoutes i n’d’avot au moins inr à s’masinr !

In histoire cha n’étot pas pus mieux. Al n’avot pas sept ans qué l’demoiselle al avot parlé d’Attila : i paraît qu’i v’not d’Asie et qu’i brisiot tout pa duss qu’i passot. I étot vraimint pas comme un eute. I d’allot s’qu’à mette ès bifteak d’su l’selle dé s’quéveu et i cavalot assis là-d’sus pou l’minger après. Josette, ed l’Asie, al d’avot jamais intindu parler ! Par cont’, al savot qu’in avot mis l’viele Lisa à l’asile pace qu’al n’savot pus cheu qu’al faisot. Alors, pour elle, Lisa et Attila i z’avot’ el même maladie et Attila i s’arot sauvé d’l’asile sans ête bin guéri ! Et ch’est cha qu’i in juot pire qu’à pinte. Quand al a dit cha à s’mère, ç telle chil, al a pas volu l’accroire, et ch’est l’garchinr du boucher, qu’avot eu ès certificat d’études qui a mis tout au clair.

Cor héreux qu’al n’avot pas té raconter cha à l’école, al d’arot cor intindu à ses orelles.

Mais l’pus belle qu’al sé rappelle, ch’est eine bonne grosse qu’al l’a sortie….Al restot au linr, alors al n’vénot pas souvint à l’école. Du fait, al intindot d’timps in temps eine vaque braire mais al n’savot pas din queulle éteule.

Interrogée d’su les dates d’histoire pour 843, al avot répondu : traité de Verdun, Charlemagne a eu ses parties divisées en trois.

I n’ont pas onsu rire ! A ç temps là in n’avot pas l’drot, sauf si l’demoiselle al comminchot. Mais ç jour là al leu z’a tourné l’deus…..

In sciences naturelles i z’étot’ té forts oussi. Surtout concernant l’hygiène.

Les aliments se mangent en utilisant la cuillère, la fourchette et le couteau. Cependant pour certains nous nous servons de nos doigts. Lesquels ?

- " les frites! " qu'al avot répondu s'viseine.

Pou passer l’certificat i faullot savoir tout un chapit’ d’su les nourrissons.

Josette, al avot té interrogée d’su les avantaches ed norrir l’z’infants à l’tette. Al avot cor toudis té rachaf’tée in répondant : le lait ne provient pas d’une vache tuberculeusse. A ch’t’heure, al répondrot : ne provient pas d’une vache folle !

Mais l’sémaine d’après, al avot té bin arvingée : ch’est s’pus grante ennemie qu’al avot récité : avant d’allaiter il faut tremper les bouts d’sein dans l’eau bouillante !!!!!

Et, avec el temps, malgré l’progrès les infants i répont’ té cor des rutes bétisses à leu maîte. El sémaine passée, l’instituteur i a fait s’leçinr d’su les fracti-inrs. V’là commins qu’i sé li a pris pou s’espliquer : votre maman s’apprète à partager sa tarte en huit. Mais, elle entend une voiture. C’est le cousin, la cousine et leurs deux enfants, quatre parts supplémentairess. Que va-t-elle faire ?

- " mi, m'maman, al muche el tarte! ", q'ui a répondu l'garchinr d'grante Rosine.

Comme cha, tout l’villache i va savoir qué l’grante Rosine al n’est pas dé l’donne.

Josette, al sé d’mante même si l’instituteur i n’frot pas semblant d’poser des questi-inrs rapport à les problèmes, pou savoir cheu qui s’passe chez les gins.

Ch’est pou cha qu’al dit à ses infants : " ènn répondez pas au maît’ quand i vous interroche, o bin vous vous f’rez rachaf’ter si vous vous trompez, o bin i ara d’treup d’plaisi d’connaîte nous habitutes. Ces lal, i veut’ té tout savoir et couquer tout seus ". 

Gisèle RAVERDY

                                                                     Gisèle RAVERDY 

Fête du patois - 2003.