Gisèle était là ! 

El 8 janvier, ch’atot l’réunion du comité d’l’Arenval. Vingt noms ! In étot eine rute tournée !

I avot les memb’ du comité et in pus les tècheniciens d’tous les activités.

Rapport à cha, in n’savot pus duss mett’ les gins. I n’d’a toute eine tripotée qui s’sont mis autour des tab’ plachées in un grand rectang’. Les eutes is s’sont estallés au mitan dé l’salle d’su les cayères mises l’eine derrière l’eute. I z’étot’ té fin contints, is s’croïot’ té din l’train ! Rin qu’à pinser qu’is z’étot’ in voïache, cha les f’sot rigoler. Vous veyez qu’i n’feut quette fos pas grand’ cosse pou rinde les gins héreux.

Bin seûr, Jean-Claude i a eu eine milette el torticolique pace qu’i s’artournot toudis pou dire des carabistoulles à Georges. Es ti chil i n’démandot pas mieux et is riot’ comme des bocheux.

Cha c’mminché pa les vœux du Président, pis les passassions d’povoirs : i n’d’a qui sont débordés d’ouvrache, d’eutes qui sont arcrants, qui s’sint’ té vieusir, alors is lais’té leu plache à des pus jonnes. Mais surtout, y a eu Alain. Cha té vraimint li l’vedette. Alors qué les eutes i tot’ épotrés autour des tab’, li i n’d’avot eine pou li tout seu et ses deux ordinateurs, un grand et un m’tieut. I tot’ alleumés, un veyot des imaches, des écritures mais d’nou plache in n’comperdot rin !

Alain i étot donc atompé face au Président et i défindot ses idées. In fait d’idées, i volot nous amicloter et surtout Nicaise pou dépinser des doub’. I avot invie d’un abonn’mint edsus internet et d’eine belle et grand’ aumère pou y mucher el matériel informatique. Bin seûr i faullot oussi acater un cad’nas. Nous, comme in est du beus qu’in fait les flûtes, in n’in disot pas eine. Nicaise, i étot blanc comme un mort, i s’camponnot à l’arbord dé s’tab’. Pace qué li, quand in touche à les doub’ dé l’caisse in i arrach’rot eine côte, in ni f’rot pas pus mau ! El Président, qui n’est pourtant pas un brissaudeux, i a té d’accord tout d’suite pou prind’ tout cheu qu’y avot d’pus quèr ! Nous, in n’d’a toudis pas dit eine, Nicaise non pus ! Ch’est ben les preuv’ qué li comme nous, i vieusit !

I feut arconnait’ qué Alain, i est vraimint fort pou saquer des doub’. In va l’déléguer au gouvernement pou d’mander à aurminter nous pinsions.

Après, y a eu Mimile et ses séances ed pèque. Myard polyte ! Cha va y aller ! Binteut tous les vendredis i s’rot’ té pris. I vont même passer eine journée au Val Joly et comme des bourgeos, minger au restaurant. Là, Mimile i a volu faire rire tertoutes in rajoutant qu’les fèmes is z’étot’ admises.

Sacré Mimile ! Comme si qu’in n’sait pas qué d’pus passés vingt ans qu’l’Arenval al existe qu’y a jamais eu d’différences inter les hommes et les fèmes. Et qué d’pus l’temps qu’nou comarate Roger, qu’i a créé l’section pèque, les fèmes is n’ont jamais té arjéttées.

I n’d’a même qui pèqu’té des brochets edsus l’temps des hommes is z’attrap’t’ des épénoques , o bin des jonnes ed canard !

Pou finir y a eu les propositions d’voïaches. Vous verrez l’détal din l’bulletin !!!!

Allez ! A l’arvoïure !

Gisèle